أفضل قصائد الشاعر السعودي مساعد الرشيدي

رحلتنا اليوم سوف تكون مع الشعر السعودي الحديث ومع واحد من أدباء الشعر المبدعين ، فهو واحد من أكبر الشعراء العرب ومن عباقرة الشعر السعودي دون جدال هو الشاعر السعودي مساعد الرشيدي ، ولد الرشيدي في مدينة الخبر وثم انتقل وبدأ حياته الأولى مع أسرته في الكويت ، قدم الكثير من قصائد الشعر إلى أن توفي في شهر يناير بعام 2017م ، واليوم سوف نقوم بعرض أفضل قصائده الرائعة تكريما له ولأعماله الشعرية الجميلة والفريدة ، وهذا ما سوف يتم عرضه خلال السطور التالية .

قصيدة كلك غلا
كلك تعالي غلا والا أرجعي كلك
بعض الغلا منك مايستاهل الجيه
طالت وانا في رجا ليتك وياعلك
اوراق بالذاكره واوراق منسيه
مابل ثوبك مطر شوقي ولابلك
لوعلتك من سحاب الروح وسميه
ليه امشي الدرب دامه مايوصلك
تخاف رمضا الضياع اقدام رجليه
يابنت تو الهوى ماصرت انا خلك
للحين مازالت الصوره رماديه
ومازال بعض الغموض الشره يحتلك
وشلون انا اعشقك واحبك على النيه
اشوفك هناك قدامي ولا ادلك
صعب الكتابه لاصار الورق ميه
ان كان شمسك تساومني على ضلك
ماعاد ابي منك لاشمس ولافيه
إما تعالي لقلب فز لك كلك
والا اتركيني ما ابي لك بالهوى جيه

قصيدة ينجرح قلب
ينجرح قلب لكن ترتفع هامه
والله اني اموت ولا انحني راسي
لو رماني زماني وسط دوامه
العواصف شديده والجبل راسي
انقل الحزن وامشي منتصب قامه
قاسي الوقت لكني بعد قاسي
واسمع الحلم يصرخ لحظة اعدامه
رابط الجاش ماهز الخبر باسي
عزتي غاليه والناس سوامه
قلت ماطيع حتى تقطع انفاسي
زانت ايام عمري شانت ايامه
مارجيت العزاء من رحمة الناسي
من عجز لايدوس الهم بقدامه
لازم انه مع الايام ينداسي
يندمل جرح قلب ماتت احلامه
بس ماضن يبرا جرح الاحساسي
يوم صارت مابين القلب والهامه
ويش ابى بالحياه اليا انحنى راسي

قصيدة الطريق المهجور
تخوفني مشاوير الطريق المظلم المهجور
واليامني ذكرتك قلت طولي يامشاويري
عزاي انك رجاي العذب لو كل الدروب عثور
وصلت أو ما وصلت أعرفك ما انته منتظر غيري
حبيبي .. وكل الله لا تحسب إني بليد شعور
لو أنت المستحيل الصعب .. ما ابدي لك معاذيري
احبك .. رغم تجريح الليال لقلبي المقهور
أشوف الجرح يكبر وأنت تكبر وسط تفكيري
احبك .. لو يموت الحب وتصير القلوب قبور
احبك كلمة لو حرموها .. حل تفكيري
احبك من هنا حتى طلوع الفجر .. حد النور
صحيح انك قدر محتوم بس أجمل مقاديري
بعذر اللي يحبك لو يصير الشاعر المشهور
لأنك تنهمر حلو القصيدة في تعابيري
احد ربي يحطك له حبيب .. ومايجيه غرور ؟
وأنا مهما بغيت استوعبك ياقل تقديري
هلا بك من قدمك … لغرتك لي شعرك المنثور
هلا في كل شيٍ فيك وأنت اغلي مساييري
أثر صدق الغلا يجبر حطام الخاطر المكسور
وأنا مهما منحتك من غلاي اشعر بتقصيري
ولو طالت مشاوير الطريق المظلم المهجور
أنا لامن ذكرتك قلت .. احبك يامشاويري

قصيدة رماد الشوق
ولع رماد الشوق يامعذبي نار
!!من كان يحلم باشتعال الرمادي ؟
ما كنت احسب انه يكون اللقا حار
لين التقينا واشبكتنا الأيادي
وقامت لنا الذكري تغني على الطار
تنساب بأسماعي نغم حب هادي
حسيت شي لفني مثل الإعصار
واستيقظت نشوة غلاك بفؤادي
أخذت لي سجه وأنا شبه منهار
بين الخيال وبين علمٍ وكادي
وفزيت يوم أنى تنبهت وش صار
مثل الذي توه صحي من رقادي
تغير الموقف بلا سابق إنذار
وغير المشاعر جت مشاعر جدادي
رديت لك عقب التجافي والانكار
وطويت صفحات الزعل والعنادي
وتبددت ذيك المبادي والافكار
ايه جنون افكار وايه مبادي
تراي انا مليتها لعبه النار
ما احد لعبها قبلنا واستفادي
من رد للجنه عقب صالى النار
حتى السموم يصير عنده برادي

قصيدة كبوة حصان
لا عــاد تـــنشد ما بـقى عـــــندي علوم
كـــــل العلوم المبـــــطيات تــخبرها
ما جــــــــيتك اشكي ميلة الوقت مزحوم
نفســي ليا ضاق المدى ما اخسرها
يا صاحبي كنت أمس كنت أمس محشوم
واليــــــوم هــج بجيتك واختصرها
خـلــك بعيد ابعد من العــــــــــام للــيوم
وأدنى من أحلام النجوم وقمـرها
بعــض الكــلام اللي تحــليه مســـــموم
وما كــل كـــف صافحتك تغــــدرها
كــــم طــيب ســــــاقـته الأقدر لرخوم
ويا كــثر ناس تــنخدع في صورها
والحــر ما يشــــره على خـــنعة البـوم
الله رفع شـــانه ووطا قـــــــــدرها
لــــــو جــيتني كنك على الوجه ملطوم
بعــض الخـطايا عذرها مـا غــفرها
عنـــدي تساوت هرجــة العــذر واللوم
هــــذيك ما ابغاها وذيـــك احتقرها
زلــه وعـــدت ما حدتــني عــــن النوم
مرت ســلام وبـعد الله كـــــــدرها
أنا اعتبرها كبـــوة حصـــــــان ويقوم
وأنت اعــتبرها زي مــا تـعتــبرها

قصيدة الكنه
عذب السجايا وعوده بأول الكنه
متى تزين السوالف وأخذ علومه
وأسامحه عن خطاه الجرح والونه
وأعاتبه لو يصد شوي والومه
وأذكره بأول المسفار حتى إنه
لامن تذكر زمان أول نسى نومه
يومن أنه أقبل خدين الروح يومنه
وأقبلت اراعيه والقومه هي القومه
من يومها والحشا ماعاد له خنه
إلا لصوته وميعاده وملزومه
عفري هنف للضلوع وجالهن حنه
وأستانست له فياض القلب ورجومه
لبى جبينه لا أرتج الغطا كنه
برق يصب الرفيف بكبد ديمومه
ما أقول شفته وشفت البيض يتلنه
أقول شفته وشفت الشمس منجومه
ما أقول كن الجديل الليل لاكنه
ليل خرعه الظلام وضيع نجومه

قصيدة مدلل زمانه
من يرد العلم لمدلل زمانه
قبل يرتد العتب من رمش عينه
من يسلم لي عليه ومعه أمانه
يعتذر من سيد القلب وظنينه
الله اللي طوع العطر لبنانه
مانشت قرنفله عن ياسمينه
كنت اسولف للندى عن قحويانه
قبل يجمعه المطر بين اصبعينه
أه منه ومن غلاه ومن حنانه
ومن نهار ماجمع بيني وبينه
ماحلا تله لقلبي وسهيانه
كن ماقبله صباح ولامدينه
كل هذا بس من ضحكة ثمانه
قاد خفاقي معه قود الرهينه
الله اعلم لاتثنى خيزرانه
من نصدق قذلته والا جبينه

نثرية رائعة باسم لندن
لندن مدينه تجنن
تشوف فيها كل شي
تشوف فيها المستحيل اقرب من الممكن
وتشوف ارض الانجليز
واليازبيث وملكها
وتشوف هايدباركها
وتشوف فيها وجيه اكثر ملامحها تقول
ان الحياه جنه
لندن مدينه تجنن
تعلمك حاجات
وتفهمك حاجات
اكثر من اللي تعرفه
واللي انت كنت تظن
لندن مدينة الضباب
تعرفك باصحاب
وتذكرك باصحاب
وتحببك باصحاب
وتعلم القلب البليد ان الزمن كذاب
لندن مثيره كلها
شمس تغازل ظلها
خذ لك بها كم يوم
ماتذوق فيها النوم
وماتشيل فيها هموم
واليا قربت تملها
وقف قليل وقلها
انا غريب ديار
واشر لتاكسي المطار
وارحل بعيد وخلها

الوسوم :

شارك المقال في صفحاتك

معلومات الكاتب

Avatar

ملاك

الصدق مبدأ .. ومنهج حياة

أكتب تعليق

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *